Posts in category: Viðburðir

Úrslit í ljósmyndasamkeppni Víðistaðakirkju voru kynnt í dag og verðlaun afhent. Fyrsta sætið hlaut ljósmynd eftir ungan og efnilegan ljósmyndara Daníel Örn Smárason. Mynd hans ber vott um gott hugmyndaflug og frumleika um leið og hún fangar viðfangsefnið vel – og rammar það skemmtilega inn:

Sigþrúður Jónasdóttir fékk önnur verðlaun fyrir mynd sem tekin er í trjágöngum á Víðistaðatúni og í þrðja sæti var Helena Björk Jónasdóttir með mynd af mannlífinu á túninu á 17. júní. Sjá allar myndirnar hér.

Þriðjudaginn 6. nóvember nk. hefjast í kirkjunni bæna- og íhugunarstundir sem verða í boði vikulega á þriðjudögum kl. 18:00. Um er að ræða Biblíulega íhugun þar sem notuð er aðferð til að tengja saman bæn og lestur Biblíunnar – sem fela í sér innlifun í ákveðnar biblíufrásagnir. Bergþóra Baldursdóttir, María Guðmundsdóttir og Nína Dóra Pétursdóttir leiða stundirnar.

Allra heilagra messa er á sunnudaginn kemur þann 4. nóvember. Þá kemur fólk saman til  messu í kirkjunni og minnist látinna ástvina sinni. Messan hefst kl. 11:00. Sjá hér.

Gissur Páll, tenórsöngvari, og Árni Heiðar Karlsson, organisti í Víðistaðakirkju, hafa verið á ferðinni um landið síðasta árið og munu nú spila á hádegistónleikum í Víðistaðakirkju föstudaginn 2. nóvember kl. 12:00 – 12:30. Á efnisskránni er úrval laga úr íslenska sönglagasafninu auk nokkurra ítalskra napólílaga og skandinavískra slagara. Tónleikarnir eru með óhefðbundnu sniði og óhætt að segja að allir muni hafa gaman af.

Aðgangseyrir að tónleikunum er kr. 1.000,- og ef fólk vill setjast niður í safnaðarheimilinu eftir tónleika og gæða sér á gómsætri súpu þá kostar það 500,- kr. til viðbótar. Allur ágóði rennur í orgelsjóð kirkjunnar.

Aðalbjörg Stefanía Helgadóttir skólahjúkrunarfræðingur heldur fræðslufyrirlestur um uppbyggileg samskipti fullorðinna og barna með Samskiptaboðorðin að leiðarljósi sem hún bjó til og gaf út fyrr á þessu ári. Fyrirlesturinn fer fram í safnaðarsalnum miðvikudaginn 31. október kl. 20:00.

Á sunnudaginn mun hafnfirski myndlistarmaðurinn Gunnlaugur Stefán Gíslason opna sýningu á nokkrum verkum sínum í safnaðarsal Víðistaðakirkju. Er sýningin liður í dagskrá Vetrardaga í Víðistaðakirkju. Opnunin fram í messukaffi að lokinni guðsþjónustu.

Guðsþjónustan á sunndaginn kemur, þann 28. október, markar upphaf Vetrardaga í Víðistaðakirkju að þessu sinni. Í guðsþjónustunni mun Karlakórinn Þrestir syngja undir stjórn Jóns Kristins Cortes. Boðið verður upp á veitingar í safnaðarsal að guðþjónustu lokinni. Sjá hér!

Konur munu sjá um alla þjónustu í guðsþjónustunni á sunnudaginn kemur utan kirkjuvarðar Karls Kristensen. Sr. Kristín Þórunn Tómasdóttir héraðsprestur sér um prestsþjónustuna, Ragnheiður Gröndal um allan tónlistarflutning og síðan munu konur úr hópi messuþjóna einnig taka þátt í guðsþjónustunni.

Sunnudagaskólinn verður svo að venju uppi í suðursalnum. Þar er boðið up á skemmtilega dagskrá fyrir börn á öllum aldri.

Sjá nánar….

Messa og barnaguðsþjónusta (sunnudagaskólinn) kl. 11:00 á sunnudaginn kemur. Nánar hér.

Víðistaðakirkja efnir til ljósmyndasamkeppni í tilefni af 25 ára vígsluafmæli kirkjunnar á næsta ári. Tilgangur keppninnar er að vekja athygli á þeim tímamótum, kirkjunni sjálfri, starfi hennar og fallegu umhverfinu á Víðistaðatúni. Þema keppninnar er „Víðistaðakirkja – Víðistaðatún“ og þurfa myndirnar því að vera teknar á því svæði.  Hver keppandi getur sent inn eins margar myndir og hann vill og þær mega vera teknar hvenær sem er. Nýheri styrkir keppnina og veitir vegleg verðlaun fyrir 3 bestu myndirnar, í 1. verðlaun er Canon Powershot A2400 IS Silver myndavél, 2. verðlaun Canon PIXMA iP4950 prentari og 3. verðlaun Pro 61,2 -151,4 cm þrífótur frá Camlink. Skilafrestur er 31. október nk. Myndir sendist á netfangið srbragi@vidistadakirkja.is merktar ljósmyndasamkeppni. Sjá nánar hér.