All posts by : wpengine

Þann 25. október nk. stendur Víðistaðakirkja fyrir styrktartónleikum til stuðnings flóttafólki. Allur ágóði tónleikanna rennur til Hjálparstarfs kirkjunnar og fer í neyðaraðstoð við flóttafólk frá Sýrlandi. Margt frábært tónlistarfólk kemur fram á tónleikunum og gefur vinnuframlag sitt til stuðnings góðu málefni:

Diddú, Bubbi Morthens, Guðrún Gunnarsdóttir, Ragnar Bjarnason, Þorgeir Ástvaldsson, Bjarni Arason, Ragnheiður Gröndal, Regína Ósk, Svenni Þór, Alma Rut, Hjörtur Howser, Eysteinn Eysteinsson, Hafsteinn Valgarðsson, Alda Dís, Tindatríó, Arnhildur Valgarðsdóttir, Kór Víðistaðasóknar og Helga Þórdís Guðmundsdóttir.

Miðaverð er kr. 2.900,- og fer miðasala fram á midi.is. Allar frekari upplýsingar er hægt að fá í Víðistaðakirkju í sími 565-2050. Sjá auglýsingu.

Guðsþjónusta verður á sunnudaginn kemur þann 4. október kl. 11:00. Kór Víðiðstaðasóknar syngur undir stjórn Helgu Þórdísar Guðmundsdóttur og sóknarprestur þjónar. Kaffi, djús og kex að guðsþjónustu lokinni.

Við munum fara með bænir, heyra biblíusögur, syngja skemmtileg og fjörug lög. Aldrei að vita nema Nebbi kíki í heimsókn og svo endum við á því að spila skemmtileg spil. Það verður heitt á könnunni fyrir fullorðnafólkið, djús og kex handa krökkunum eftir stundina.

Hlökkum til að sjá ykkur!

Kærleikskveðja, María og Benni.

Á sunnudaginn kemur þann 27. sept. fer guðsþjónusta safnaðarins fram í Skálholtskirkju og hefst kl. 11:00. Kór Víðistaðasóknar syngur undir stjórn Helgu Þórdísar Guðmundsdóttur og sr. Halldór Reynisson prédikar og þjónar fyrir altari ásamt sr. Braga J. Ingibergssyni.

Fólk er hvatt til þess að leggja leið sína í Skálholt og mælst er til þess að það mæti við Víðistaðakirkju um kl. 09:00, sameinist í bíla og leggi svo af stað ekki seinna en kl. 09:15.

Messa kl. 11:00. Kór Víðistaðasóknar syngur undir stjórn Helgu Þórdísar Guðmundsdóttur og sóknarprestur prédikar og þjónar fyrir altari. Efnt verður til samskota til stuðnings starfi HK með flóttafólki.

Sunnudagaskólinn kl. 11:00, uppi í suðursal kirkjunnar. Biblíusögur, bænir, fjörug lög, föndur og skemmtilegir leikir. Nebbi kíkir væntanlega í heimsókn! Fjölbreytt dagskrá fyrir börn á öllum aldri!

Kaffi, djús og kex að guðsþjónustum loknum.

Kyrrðarstundir verða á miðvikudögum kl. 12:00 í vetur eins og undanfarin ár – sú fyrsta á morgun, miðvikudaginn 16. september. Lestrar, bænir og ljúf tónlist einkenna stundirnar. Hægt er að koma bænarefnum til sóknarprests símleiðis eða í netpósti. Boðið verður upp á súpu í safnaðarheimilinu að kyrrðarstund lokinni.

Samþykkt sóknarnefndar og sóknarprests Víðistaðakirkju 9. september 2015:

Móttaka flóttamanna í Hafnarfirði 

Sóknarnefnd og sóknarprestur Víðistaðakirkju lýsa yfir fullum stuðningi við samþykkt fjölskylduráðs Hafnarfjarðarbæjar, frá 2. september síðastliðnum, um þátttöku í því mikilvæga verkefni að taka á móti og aðstoða hópa flóttafólks.

Víðistaðakirkja býður fram aðstoð sjálfboðaliða og starfsfólks auk aðstöðu í kirkju og safnaðarheimili, eftir því sem við á. Þá býður sóknarprestur upp á sálgæsluþjónustu eins og þörf krefur.

Víðistaðakirkja mun einnig, ásamt öðrum söfnuðum Þjóðkirkjunnar, efna til samskota í kirkjunni sunnudagana 13. og 20. september nk. til stuðnings Hjálparstarfi kirkjunnar í starfsemi sinni innan ACT – Alliance á Sýrlandi og Jórdaníu.

Hjálparstarf kirkjunnar er aðili að Alþjóðahjálparstarfi kirkna ACT – Alliance sem ásamt því að vinna að þróunarsamvinnu veitir neyðaraðstoð í kjölfar náttúruhamfara og vegna vopnaðra átaka. Aðstoðin er veitt án skilyrða og aðgreiningar og fer fram eftir alþjóðlegum stöðlum um neyðaraðstoð og ströngum siðareglum. Hjálparstarf kirkjunnar veitir neyðaraðstoð vegna stríðsátaka á Sýrlandi í gegnum ACT þar sem leitast er við að uppfylla grunnþarfir hinna stríðshrjáðu.  Áhersla er lögð á vernd og aðstoð til handa konum og börnum á vergangi í landinu og flóttafólki í nágrannalöndunum.

Á sunnudaginn kemur, þann 13. september, verður fjölskylduhátíð í kirkjunni kl. 11:00. María og Bryndís leiða stundina ásamt sóknarpresti. Þá hefst sunnu- dagaskólinn aftur með nýju efni og meðal annars verður Nebbi kynntur til sögunnar.

Fjölbreytt dagskrá fyrir börn á öllum aldri, verið með frá byrjun!

Efnt verður til samskota til stuðnings HK í starfi með flóttafólki.

 Samvera með foreldrum fermingarbarna eftir guðsþjónustu.

Fyrsta guðsþjónustan eftir sumarhlé verður á sunnudaginn kemur, þann 6. sept. kl. 11:00. Kór Víðistaðasóknar syngur undir stjórn Helgu Þórdísar Guðmundsdóttur og sóknarprestur þjónar með aðstoð sjálfboðaliða í messuhópi kirkjunnar. Fermingarbörn eru hvött til að mæta ásamt fjölskyldum sínum. Hressing í safnaðarheimilinu eftir messu. Verið velkomin!

Æfingar hjá Barnakór Víðistaðakirkju hefjast í næstu viku  og verða á fimmtudögum kl. 14.20.

Öll börn 8 ára og eldri (3.bekk) eru velkomin í kórinn og kostar ekkert að vera í kórnum.

Æfingar eru 45 mínútur í senn en stundum lengur ef sérstakar raddæfingar eru og er þá látið vita fyrirfram af því.  Börnin syngja 5-6 x yfir veturinn í fjölskylduguðsþjónustum eða á öðrum hátíðisstundum í kirkjunni, verðlaunadagar eru reglulega og ýmislegt annað skemmtilegt og uppbyggilegt fyrir börnin.  Lagt er kapp á að þau fái að vinna amk. 1x yfir veturinn með þekktum söngvurum og afraksturinn fluttur í fjölskyldustund. Reynt verður að stefna að því að komast á amk. eitt kóramót með kórinn.

Mikilvægt er að börnin séu skráð í kórinn svo foreldrar séu að fá allar upplýsingar í gegn um tölvupóst, en börnin fá líka alltaf miða með sér heim þegar eitthvað sérstakt er framundan.  Skráningarmiðar liggja frammi í kirkjunni og líka hægt að nálgast þá á æfingum.

Kórstjóri er Helga þórdís, organisti kirkjunnar og er hægt að fá nánaru upplýsingar hjá henni á netfangið helga@vidistadakirkja.is eða í síma 8683110.